33 വർഷങ്ങൾ പിന്നിടുന്ന സെയിൽസ് ടാക്സ് വോയിസ് മാസികയിൽ തുടക്കം മുതൽ അതിന്റെ പിന്നണി പ്രവർത്തകർ എന്നെ ഏല്പിച്ച ചുമതലയും ഉത്തരവാദിത്വവും ഇന്നും സന്തോഷത്തോടെ തുടരുകയാണ്. വില്പനനികുതി, വാറ്റ്, ചരക്കുസേവനനികുതി, നിയമങ്ങളിലും, ചട്ടങ്ങളിലും വ്യാപാരികൾക്കും, പൊതുജനങ്ങൾക്കുമുള്ള ആശങ്കകളും സംശയങ്ങളും പരാതികളും കേൾക്കുകയും ചർച്ചചെയ്യുകയും വ്യാഖ്യാനങ്ങളിലൂടെയും, നിഗമങ്ങളിലൂടെയും, അവയ്ക്കു വ്യക്തത വരുത്താൻ ശ്രമിക്കുകയും ചെയ്യുന്നത് പലപ്പോഴും ദുഷ്കരമാണെങ്കിലും ഏതാണ്ട് തൃപ്തികരമായ രീതിയിൽ ആ ദൗത്യം പൂർത്തിയാക്കാനാകുന്നുവെന്ന് എനിക്ക് സംതൃപ്തിയുണ്ട്.
ഒരുകാലത്തു ഡിപ്പാർട്ട്മെന്റ് ജീവനക്കാരുടെ നാവായിരുന്നു സെയിൽസ് ടാക്സ് വോയിസ്. അതുകൊണ്ടു തന്നെ ഒരു കാലഘട്ടത്തിൽ നികുതിദായകരും നികുതി പിരിക്കുന്ന ഉദ്യോഗസ്ഥന്മാരും തമ്മിലുണ്ടായ സംഘർഷങ്ങളുടെ നാളുകളിൽ മാസികയ്ക്ക് ഒരു ഭാഗത്തു ഉറച്ചു നിൽക്കേണ്ടി വന്നിട്ടുണ്ട്. എന്നാൽ ഇന്ന് നികുതി ദായകരും അവരുടെ സംഘടനകളും ഉദ്യോഗസ്ഥരും മാസികയുടെ അണിയറ പ്രവർത്തകരും ഒത്തൊരുമിച്ചു മുന്നോട്ടു പോകുന്നതായിട്ടാണ് കാണാൻ കഴിയുന്നത്. ആ ഒത്തൊരുമയിലൂടെയുണ്ടായ വളർച്ചയുടെ ഭാഗമായിട്ടാണ് ഓൺലൈൻ പ്രസിദ്ധീകരണമായിട്ടു കൂടി ആരംഭിക്കുന്നതിന് മാസികയ്ക്ക് ചിന്തിക്കാൻ കഴിഞ്ഞിട്ടുള്ളത്. എല്ലാവിധ ഭാവുകങ്ങളും ആശംസിക്കുന്നു. മാസികയുടെ മുന്നോട്ടുള്ള പ്രയാണത്തിൽ വരും കാലങ്ങളിലും ഞാനുണ്ടാകുമെന്ന് തീർച്ചയായും പ്രതീക്ഷിക്കാം.

                                                      അഡ്വ . എസ്. അനിൽകുമാർ, കേരള ഹൈക്കോടതി