സെയിൽസ് ടാക്സ് വോയിസ് മാസിക കാറ്റഗറി ഭേദമന്യേ രാഷ്ട്രീയ ഭേദമന്യേ വാണിജ്യ നികുതി വകുപ്പിലെ ജീവനക്കാരുടെയും അവരുടെ സംഘടനയായ കേരള സ്റ്റേറ്റ് കാർഷികാദായനികുതി – വില്പനനികുതി ഡിപ്പാർട്ട്മെന്റൽ സ്റ്റാഫ് അസോസിയേഷന്റെയും ശബ്ദമായിട്ടാണ് തുടക്കം. അതും 33 വർഷങ്ങൾക്കു മുൻപ് 1990-ൽ , പിന്നീട് കാർഷികാദായനികുതി ഏതാണ്ട് ഇല്ലാതാക്കി. വില്പന നികുതിയ്ക്ക് രൂപഭേദങ്ങൾ വരുത്തി വാല്യൂ ആഡഡ് ടാക്‌സാക്കി. ഏറ്റവും ഒടുവിൽ ഒരേ ഒരു ഇന്ത്യ – ഒരൊറ്റ നികുതി എന്ന മുദ്രവാക്യം ഉയർത്തി ചരക്കു സേവന നികുതി വന്നു. സംഘടനയുടെയും മാസികയുടെയും നിലപാടുകളിലും ഈ കാലഘട്ടത്തിൽ മാറ്റങ്ങൾ വന്നു കൊണ്ടിരുന്നു.സംഘടനയുടെയും ജീവനക്കാരുടെയും മാത്രം ശബ്ദം എന്നതിലുപരി കാലാ കാലങ്ങളിൽ നികുതി നിയമങ്ങളിൽ വരുത്തിയ മാറ്റങ്ങളുടെ വിലയിരുത്തലുകൾ, നിയമഭേദഗതികൾ, അവ ഓരോന്നും നികുതി പിരിവ് മേഖലയിൽ വരുത്തുന്ന മാറ്റങ്ങൾ, നികുതി നിരക്കുകൾ, ചട്ടങ്ങൾ എന്നിവയിൽ വരുത്തുന്ന മാറ്റങ്ങൾ, അവ എങ്ങനെ വ്യാപാരികളെയും പൊതുജനങ്ങളെയും ബാധിക്കുന്നുവെന്നത് ഈ രംഗത്തെ പ്രഗത്ഭന്മാർ മാസികയിൽ വിശകലനം ചെയ്തു തുടങ്ങി.

നികുതി മേഖലയിലെ അതികായന്മാർ, ഡിപ്പാർട്ട്മെന്റ് അധികാരികൾ, വ്യാപാരി നേതാക്കൾ എന്നിവരാണ് നികുതി സംബന്ധമായ വിഷയത്തിൽ വിശകലനങ്ങളും വിലയിരുത്തലുകളും നടത്തുന്നത്. മുൻ സർക്കാരിന്റെ നികുതി ഉപദേഷ്ടാവായിരുന്ന അഡ്വ.എസ്. അനിൽകുമാർ വ്യാപാരികൾക്കും പൊതുജനങ്ങൾക്കും നികുതി സംബന്ധമായ സംശയങ്ങൾക്ക് മറുപടി നൽകുന്നു. തിരക്കിനിടയിൽ മനസിന്റെ പിരിമുറുക്കം കുറയ്ക്കുന്ന നർമ്മ ഭാവനകൾ, കവിതകൾ, കഥകൾ, എന്നിവയും ഇപ്പോഴത്തെ മാസികയുടെ ഉള്ളടക്കത്തിൽപ്പെടുന്നു. ജി.എസ്.ടി സംബന്ധമായ പ്രശ്നങ്ങൾക്ക് സൗജന്യമായ നിയമോപദേശവും സഹായങ്ങളും മാസിക വ്യാപാരികൾക്ക് ലഭ്യമാക്കുന്നു. അന്വേഷിച്ചു നടക്കാതെ നികുതി സംബന്ധമായ എല്ലാ കാര്യങ്ങളും യഥാസമയം വ്യാപാരികളുടെയും ജീവനക്കാരുടെയും പൊതുജനങ്ങളുടെയും അടുത്തെത്തിക്കുകയാണ് ഞങ്ങളുടെ ലക്ഷ്യം.

പി.പുരുഷോത്തമൻ
പത്രാധിപർ